Archive

Archive for the ‘મુકુલ ચોકસી’ Category

પાડોશી જેવું હોય છે – મુકુલ ચોકસી

April 4, 2014 Leave a comment

ભીંતને લીધે જ આ પાડોશી જેવું હોય છે,
એક સમજૂતીસભર ખામોશી જેવું હોય છે…

તન જિવાડી રાખતા એક જોષી જેવું હોય છે,
મન કોઈ મરવા પડેલી ડોશી જેવું હોય છે…

એ મને મૂકીને ફરવા પણ જઈ શકતો નથી,
મારા પડછાયાને પણ નામોશી જેવું હોય છે…

– મુકુલ ચોકસી

સમયનો સાદો નિયમ છે – મુકુલ ચોકસી

August 24, 2013 Leave a comment

સમયનો સાદો નિયમ છે કે એ અટકતો નથી,
નિયમ છે પ્રેમનો સાદો, કદી ખટકતો નથી,
તમારો સાદો નિયમ છે સહુને ભટકાવો,
ને મારો સાદો નિયમ છે કે હુ ભટકતો નથી…

– મુકુલ ચોકસી

એક આંખ વિધવા છે અને બીજી કુંવારી છે – મુકુલ ચોકસી

August 8, 2013 Leave a comment

અહીંથી આવ-જા કરતા બધા બસ રાહદારી છે,
અહીં દ્વારો વગરનું ઘર અને હજ્જારો બારી છે…

હવે વારાંગનાના બારણાથી પણ વધુ ખુલ્લી,
આ મારી ખુલ્લી છાતી પર સજાવેલી પથારી છે…

છતાં એવી જ નિર્મમતાથી પીડે છે હજુ આજે,
ગયા ભવમાં હતી જે શોક્ય આ ભવમાં અટારી છે…

પ્રતીક્ષાની પીડાઓ તો અ.સૌ. છે ને અ.સૌ. રહેશે,
ભલે એક આંખ વિધવા છે અને બીજી કુંવારી છે…

– મુકુલ ચોકસી

ખબર છે તને? – મુકુલ ચોકસી

July 31, 2013 Leave a comment

હૃદયને રસ્તે હું જન્મ્યો હતો, ખબર છે તને?
રુદનને બદલે હું મલક્યો હતો, ખબર છે તને?

હું તારી લટને કિનારે જ આવીને અટક્યો,
ક્ષિતિજના ઢાળથી લપસ્યો હતો, ખબર છે તને?

બિચારા ઈવ કે આદમને કંઈ ખબર ન્હોતી,
પ્રણય મેં એમને શીખવ્યો હતો, ખબર છે તને?

એ વર્ષોમાં તો રચાઈ નહોતી ભાષા છતાં,
હું બૂમ પાડીને બોલ્યો હતો, ખબર છે તને?

સમયની શોધ થઈ તેની આગલી સાંજે,
મેં ઇન્તજારને શોધ્યો હતો, ખબર છે તને?

– મુકુલ ચોકસી

છે એમાં અભાવ દોસ્ત – મુકુલ ચોકસી

July 30, 2013 Leave a comment

એક આખી જિંદગીનો છે એમાં અભાવ દોસ્ત,
આ ખાલી જામનુંય વજન છે ઉઠાવ દોસ્ત…

જીરવી શકાશે પૂર્ણ ઉપેક્ષાનો ભાવ દોસ્ત,
પણ જીરવી ના શકાશે અધૂરો લગાવ દોસ્ત…

દરિયામાં મોજાં આવે, બધે આવતા નથી,
અમથી જ રાહ જોયા કરે છે તળાવ દોસ્ત…

દરિયા-પહાડ-આભમાં જો ના સમાય તો,
નાની ચબરખીમાં પ્રણયને સમાવ દોસ્ત…

તાજાકલમમાં એ જ કે તારા ગયા પછી,
બનતો નથી આ શહેરમાં એકે બનાવ દોસ્ત…

– મુકુલ ચોકસી

ગઝલ લખાતી નથી – મુકુલ ચોકસી

July 29, 2013 Leave a comment

પ્રલંબ જીવી જવાથી ગઝલ લખાતી નથી,
ને મોત વહેલું થવાથી ગઝલ લખાતી નથી…

નહીં તો સંતો ગઝલકાર થઈ ગયા હોતે,
ફકત પ્રભુની કૃપાથી ગઝલ લખાતી નથી…

મરીઝ જેવા સરળ પારદર્શી બનવું પડે,
ફકત શરાબ પીવાથી ગઝલ લખાતી નથી…

ગઝલ લખાય તો ક્યારેક અમથી અમથી લખાય,
અને નહીં તો કશાથી ગઝલ લખાતી નથી…

– મુકુલ ચોકસી

હઠ લઈ બેઠા – મુકુલ ચોકસી

July 28, 2013 Leave a comment

અમે કેકટસને કાંઠે લાંગરેલા હાથ થઈ બેઠા,
તમે પણ કેટલો લોહીલુહાણ આધાર દઈ બેઠા…

તો વચ્ચેની જગાને સૌ તળેટી નામ દઈ બેઠા,
જો પહાડો ખીણથી બે ચાર ડગલાં દૂર જઈ બેઠા…

નિચોવાઈ ગયેલા હોઠને જોયા તો યાદ આવ્યું,
ફરી ક્યાં કોઈનું ગમતું પલળતું નામ લઈ બેઠા…

અવસ્થાની નદીમાં આજ ઘોડાપૂર આવ્યાં ને,
અમે કાંઠા કદી નહી છોડવાની હઠ લઈ બેઠા…

– મુકુલ ચોકસી