Archive

Archive for the ‘જવાહર બક્ષી’ Category

લખી બેઠો – જવાહર બક્ષી

September 25, 2014 Leave a comment

આખરે હું ગઝલ લખી બેઠો,
રાહ જોઈને ક્યાં સુધી બેઠો…

દૂરતા ઓગળી રહી જ હતી,
સ્પર્શ વચ્ચે જ ઘર કરી બેઠો…

ઓ વિરહ! થોડું થોભવું તો હતું,
એમનું નામ ક્યાં લઈ બેઠો…

કેટલાં કારણો હતાં નહિ તો,
કોઈ કારણ વિના ફરી બેઠો…

ફક્ત તારા સુધી જ જાવું’તું,
પૂછ નહિ ક્યાંનો ક્યાં જઈ બેઠો…

આજ પણ એ મને નહીં જ મળે,
આજ પાછું સ્મરણ કરી બેઠો…

ચહેરા રહી ગયા – જવાહર બક્ષી

May 15, 2014 Leave a comment

એ તો ગયા, પણ એમના ચહેરા રહી ગયા,
લાગ્યા કરે છે કે એ જવાનું ભૂલી ગયા…

નિસ્તબ્ધતા વિરહની હવામાં ભળી ગઇ,
ચહેરાના ભાવ પર્ણની રેખા બની ગયા…

જે શબ્દ રહી ગયા’તા ગયામાં બરફ થઇ,
વાતાવરણમાં ઓગળી પડઘા થઇ ગયા…

સંતાઇ ગઇ છે ઓરડામાં ક્ષણ વિદાયની,
ઘરમાં સમયની વાંસના ફોડાં ઉગી ગયા…

કોઇ ગયું છે એ છતાં કોઇ નથી ગયું,
ખાલીપણાના ભારમાં પગ ઉપડી ગયા…

આપ કહો તો આંખો ખોલું – જવાહર બક્ષી

September 13, 2013 Leave a comment

રાત, પ્રતીક્ષા, ઊંઘનું ઝોલું,
શ્રદ્ધા જેવા લયથી ડોલું…

હું ઝાકળના શહેરનો બંદી,
બોલ, ક્યો દરવાજો ખોલું…

થાય સજા પડઘા-બારીની,
ત્યાં જ તમારું નામ ન બોલું…

આવરણોને કોણ હટાવે,
રૂપ તમારું આખાબોલું…

સ્વપ્નાંઓ સંપૂર્ણ થયાં છે,
આપ કહો તો આંખો ખોલું…

– જવાહર બક્ષી

પડઘો થઇ ગયો – જવાહર બક્ષી

September 12, 2013 Leave a comment

આંખોનો ભેદ આખરે ખુલ્લો થઇ ગયો,
બોલ્યા વિના જ હું બધે પડઘો થઇ ગયો…

આ એ જ અંધકાર છે કે જેનો ડર હતો,
આંખોને ખોલતાં જ એ તડકો થઇ ગયો…

જળને તો માત્ર જાણ છે, તૃપ્તિ થવા વિષે,
મૃગજળને પૂછ કેમ હું તરસ્યો થઇ ગયો…

તારી કૃપાથી તો થયો કેવળ બરફનો પહાડ,
મારી તરસના તાપથી દરિયો થઇ ગયો…

મસ્તી વધી ગઇ તો વિરક્તિ થઇ ગઇ,
ઘેરો થયો ગુલાલ તો ભગવો થઇ ગયો…

– જવાહર બક્ષી

એક અણસારનો પડદો છે – જવાહર બક્ષી

September 11, 2013 Leave a comment

એક અણસારનો પડદો છે ને ઘર ખુલ્લું છે,
રોજ બત્તીનો સમય છે અને અંધારું છે…

ભૂખરાં વાદળો સાથે કરો તારા મૈત્રી,
ક્યાં કોઇ ખાસ પ્રતિક્ષામાં ભીંજાવાનું છે…

ખીણમાં રોજ ગબડવાનું છે ખુલ્લી આંખે,
ને ફરી ટોચ સુધી એકલા ચડવાનું છે…

કોઇ પછડાટ નહીં, વ્હાણ નહીં, ફીણ નહીં,
સંગે મરમરની લહેરોમાં તણાવાનું છે…

આ નગરમાં તો સંબંધોના ધૂમાડા જ ખપે,
અહીંયાં ઊર્મિ તો અગરબત્તીનું અજવાળું છે…

– જવાહર બક્ષી

ફરી ન છૂટવાનું બળ – જવાહર બક્ષી

September 10, 2013 Leave a comment

ફરી ન છૂટવાનું બળ જમા કરે કોઇ,
પ્રસંગ, નહિ તો મિલનના જતા કરે કોઇ…

મને ઘણાય તમારો સંબંધ પૂછે છે,
તમારી પણ કદી એવી દશા કરે કોઇ…

તમારી પાસ જવાની નથી થતી ઇચ્છા,
મને ફરીથી જવાની મના કરે કોઇ…

ભલે અવાજની ક્ષિતીજમાં જઇ ન શકાય,
વિચારને તો જતા-આવતા કરે કોઇ…

કોઇ નજીક નથી, એ વિષે હું કૈં ન કહું,
આ સંકડાશ વિષે સ્પષ્ટતા કરે કોઇ…

ગુન્હા કર્યા તો ‘ફના’ મેં ગુન્હા તમારા કર્યા,
મને એ માન્ય નથી કે સજા કરે કોઈ…

– જવાહર બક્ષી

આખરે હું ગઝલ લખી બેઠો – જવાહર બક્ષી

September 9, 2013 Leave a comment

આખરે હું ગઝલ લખી બેઠો,
રાહ જોઈને ક્યાં સુધી બેઠો…

દૂરતા ઓગળી રહી જ હતી,
સ્પર્શ વચ્ચે જ ઘર કરી બેઠો…

ઓ વિરહ, થોડું થોભવું તો હતું,
એમનું નામ ક્યાં લઈ બેઠો…

કેટલાં કારણો હતાં નહિ તો,
કોઈ કારણ વિના ફરી બેઠો…

ફક્ત તારા સુધી જ જાવું’તું,
પૂછ નહિ ક્યાંનો ક્યાં જઈ બેઠો…

આજ પણ એ મને નહીં જ મળે,
આજ પાછું સ્મરણ કરી બેઠો…

– જવાહર બક્ષી