Archive

Archive for the ‘અમૃત કેશવ નાયક’ Category

નર બળે છે – ‘અમૃત’ કેશવ નાયક

March 10, 2013 Leave a comment

આંખોથી વહે છે ધારા, તોયે જીગર બળે છે,
ચોમાસે ભરપૂરે, આકાશનું ઘર બળે છે…

તેજસ્વી ઘર જોશે શું કોઈ તે સનમનું?
જેની ગલીમાં ઊડતાં, પંખીનાં પર બળે છે…

ફુર્કતની આગ દાબું, તો ભસ્મ થાય હૈયું,
ફિર્યાદ કરું છું તો, જિવ્હા અધર બળે છે…

મૃત છું હું તોય જીવું, માશૂક અમૃત પાયે,
વર્ના તમાશો જોશે કે, કેમ નર બળે છે…

– ‘અમૃત’ કેશવ નાયક

હાલ અબતર છે – ‘અમૃત’ કેશવ નાયક

March 9, 2013 Leave a comment

કદી તલવારની ધમકી, કદી કર માંહી ખંજર છે,
ગઝલમાં જીવ આશકનો ડગે, ડગ દિલમહીં ડર છે…

ઘડીમાં જીવ જોખમમાં, ઘડીમાં જીંદગી ભયમાં,
પડ્યું પરહાથ દિલ આ આજ, આંખો શૂળી ઉપર છે…

ન છૂટે ધ્યાન પ્રતિમાનું, ખુદાની યાદ ના આવે,
પડ્યા પથ્થર સમજમાં શું, કહે લોકો કે કાફર છે…

જીગરનો દાગ જૂનો છે, નિરાશાનો નમૂનો છે,
સહુ સંસાર સૂનો છે, ઉજ્જડ આશક તણું ઘર છે…

તમો ધનવાન છો તો, મુજ સમા લાખો ભિખારી છે,
કમાઈ રૂપનીમાં આશકોનો લાગ ને કર છે…

હ્રદય ચાહે સદા જેને દયા આવે નહીં તેને,
બળ્યું એ જીવવું એના થકી, મરવું જ બહેતર છે…

નહીં ભૂલું અમૂલું મુખ કદી ડૂલું થયું તો શું,
કપાઈ સર સરાસર બોલશે બસ, તું જ સરવર છે…

ઊઠ્યો ચમકી હું રાતે વસ્લની જીહિદ તણી બાંગો,
અહીં તકબીરના શબ્દો સદા અલ્લાહ અકબર છે…

ન કર અમૃત શિકાયત કે, એ બૂત છે પથ્થરો છે બસ,
હ્રદય તુજ મીણનું રાખ્યાથી, તારો હાલ અબતર છે…

– ‘અમૃત’ કેશવ નાયક

કરું કે ન કરું – ‘અમૃત’ કેશવ નાયક

March 8, 2013 Leave a comment

દૂર દિલથી સહું સંસાર, કરું કે ન કરું?
હ્રદયમાં આપનું આગાર, કરું કે ન કરું?

તમે કરશો કે જફા મારી વફાને બદલે?
કહોને, અય સનમ, હું પ્યાર, કરું કે ના કરું?

સામો આવું છું તો પરદામાં મુખ છુપાવો છો,
દાર પર થાય, તો દિદાર, કરું કે ન કરું?

નાક તકફૂલ કમલ મુખ ને આંખ નરગિસની,
બધું લઈને ગળે હાર, કરું કે ન કરું?

હાથ તલવાર ધરી, શીશ આશકે નામ્યું,
પછી વિચાર વળી, વાર, કરું કે ન કરું?

કઓલ પહેલાં મને માગ્યા વિના આપી બેઠાં,
હવે ખિયાલ એ, દરકાર, કરું કે ન કરું?

બૂતો બેકદ્ર છે, લાખોને કર્યા છે પા’માલ,
દિલ હું આપીને ઈતબાર, કરું કે ન કરું?

મારું દિલ છીનવી, ના કહે છે આપવા પાછું,
તોછડું લાગશે, તકરાર, કરું કે ન કરું?

બહુ તરસાવી બગલગીર થયો છે ઐયાર,
બોસા લાખો લઈ, બેઝાર, કરું કે ન કરું?

કોટિ સર દાર પર જેણે ચઢાવ્યાં છે અમૃત,
બેરહમ તેને હું, સરદાર, કરું કે ન કરું?

– ‘અમૃત’ કેશવ નાયક