Home > આદિલ મન્સૂરી, કવિતા, ગઝલ, ગીત > દિલમાં કોઇની યાદનાં – ‘આદિલ’ મન્સૂરી

દિલમાં કોઇની યાદનાં – ‘આદિલ’ મન્સૂરી

February 13, 2013

દિલમાં કોઇની યાદનાં પગલાં રહી ગયાં,
ઝાકળ ઊડી ગયું અને ડાઘા રહી ગયા…

એને મળ્યા, છતાંય કોઇ વાત ના થઇ,
ગંગા સુધી ગયા અને પ્યાસા રહી ગયા…

ફૂલો લઇને બાગથી હું નીકળી ગયો,
ને પાનખરના હાથમાં કાંટા રહી ગયા…

આવીને કોઇ સાદ દઇને જતું રહ્યું,
ખંડેર દિલમાં ગુંજતા પડઘા રહી ગયા…

વરસ્યા વિના જતી રહી શિર પરથી વાદળી,
‘આદિલ’ નજર ઉઠાવીને જોતા રહી ગયા…

– ‘આદિલ’ મન્સૂરી

Advertisements
%d bloggers like this: