Home > આદિલ મન્સૂરી, ગઝલ > હવાનાં ઊછળતાં હરણ આવશે – ‘આદિલ’ મન્સૂરી

હવાનાં ઊછળતાં હરણ આવશે – ‘આદિલ’ મન્સૂરી

October 3, 2012

હવાનાં ઊછળતાં હરણ આવશે,
ને સૂરજનું ધગધગતું રણ આવશે…

ઊઘડતો જશે એક ચહેરો સતત,
સ્મરણમાંય એનું સ્મરણ આવશે…

હશે કોઈ સામે ને અડવા જતાં,
ત્વચા સ્પર્શનું આવરણ આવશે…

રહેવા દો દરવાજા ખુલ્લા હવે,
છે આશા હજી એક જણ આવશે…

તમે પાછા કરશો ખુલાસા નવા,
અને અમને વિશ્વાસ પણ આવશે…

સમયની તો સીમાઓ પૂરી થઈ,
હવે જોઈએ કેવી ક્ષણ આવશે…

અમસ્તા જ દરવાજો ખોલ્યો અમે,
હતી ક્યાં ખબર કે મરણ આવશે…

– ‘આદિલ’ મન્સૂરી

Advertisements
%d bloggers like this: